Cuenta mio güela con emoción qu’a un familiar suyu espropiáron-y la casería que tenía en San Andrés de la que diben a llevantar Ensidesa. El paisanu treslladó l’horru a otru prau que tenía na parroquia y, a la vera, llevantó dos cases nueves: una pa él y otra pal fíu. Al poco d’estrenales llegó una nueva espropiación de la mano del proyectu de la que sería l’autopista Y.

Mio güela siempre acaba’l rellatu cola mesma frase “al final, aforcóse”, con esi xestu resignáu del que piensa “pues claro, ¿qué diba facer sinón?”.

Esta tarde lleo nel periódicu que’l nuevu conseyeru d’infraestructures, Juan Vega, ve “serias difícultaes” al proyectu de la ZALIA. Ye inevitable venceyar esti titular con otros munchos, los más d’ellos ayenos a los medios oficiales:  la intimidación a la que fueron sometíos los vecinos, l’estudiu d’impactu ambiental pola cercanía del banzáu de San Andrés, les marches verdes, les espropiaciones, les 31,760 firmes presentaes pa exercer el drechu a la iniciativa popular que l’Ayuntamientu denegó; y tamién la pala poniéndose siempre del llau d’unes instituciones soberbies que poco ficieron polos dueños d’aquellos praos y aquelles cases.

Cuéstame creer que, dempués de too, el proyectu tea muertu, pero más me cuesta identificame con un conceyu amnésicu colos malos hábitos políticos, sobre manera cuando al que manquen ye al paisanu que, como n’aquella película irlandesa “The field”, sigui agarráu a la tierra y dispuestu a resignase, ¿qué va facer sinón?.

A la fín, los horros, yá tán valtaos.

Semeyes de Pelayo Duarte.

Esti xueves va tener llugar en Xixón la primer de les meses qu’entama la Xunta pola Defensa de la Llingua Asturiana dientro de les Xornades 15 años del Llibru Blancu. Revisión y actualización de la política llingüística. A esta, que toca’l tema educativu, van siguí-y tres más sobre medios de comunicación, servicios de normalización llingüística y recuperación llingüística.

En fin, qu’hai que dir.

Dándo-y color a la música.

.. en casa.

Una rutina ensin imáxenes televisives ye poder citar l’aliniación del Sporting pero nun ser quien a pone-yos cara.Ye soprendese colos anuncios qu’emiten nos bares. Ye vivir una Revolución Árabe, unes elecciones, una guerra, un chantaxe financieru, traducíu en palabres que se lleen y se sienten. Ye nun poder participar nes conversaciones del Claustru de Profesores. Ye tener un amor platónicu que se llama Javier Gallego “crudo”. Ye facer vezu l’enfadu contra la parcialidá de La Ser y desear que Radio5 emita más noticies y menos espacios vacíos. Ye pensar que l’asturianu de la madre de Pachi Poncela ye de lo meyor que se sintió na RTPA. Ye querer adoptar a Juan de Pablos como güelu, padre o lo que seya. Ye nun entender la siesta ensin “Los elefantes”.

Ye perdese coses pa perdese nel xuegu de l’abstracción que te da un día ensin imáxenes.

Sobre una de les cames de mio casa hai una manta de llana a cuadros de colores. Ye la única manta que me tien soportao toles mudances. Nun ye que costara mucho, valórola simplemente porque la fici yo y porque foi mui güela la que m’enseñó a texer.

Pilar García Cuetos, profesora d’Historia del Arte de la Universidá d’Uviéu, comentaba hai unos meses nuna tertulia sobre patrimoniu la esistencia de los llamaos “tesoros humanos vivos”, xente que tien un conocimientu escepcional sobre elementos culturales concretos. Al paecer en llugares como Xapón asignase a los artesanos qu’algamen esti estatus aprendices voluntarios qu’aseguren la sobrevivencia del conocimientu.

Hai unes selmanes alcordéme tamién d’esta historia a propósitu d’esta preciosa serie de documentales “Made by Hand”, sobre los nuevos artesanos d’Estaos Xuníos.

Clase de sestu d’Educación Primaria. Tán sentaos xuntos un neñu y una neña qu’intenten ponese d’alcuerdu pa facer la ilustración d’un cuentu qu’acaben escribir sobre’l diañu burllón. El neñu pregunta:

- ¿Ponémos-y una vara?

- ¡sí! una varita mágica.

- ¡No! ¿cómo vas pone-y una “varita mágica” a un diablu? dígote un cayáu….

- ¿?

- lo de llendar les vaques…

- ¿?

- lo que lleven los vieyos p’apoyase…

- ¿Un bastón?

- ¡Eso!

Lliteral.

Acabante terminar la llectura de De totalitarios a demócrates: Franquismu, fascismu y nazismu na II Guerra Mundial al traviés del diariu xixonés “Voluntad” de Pablo Rodríguez Alonso (Zahorí Ediciones, 2011).

En primer llugar una reflexón obligada: esti llibru foi ganador, na so decimosegunda edición, del Premiu Rosario Acuña, ún de los de más sonadía d’Asturies nel ámbitu del ensayu y la investigación. Y resultó ganador siendo un trabayu redactáu enteramente  n’asturianu (sacante les cites entesacaes de les páxines de Voluntad). Si bien ye verdá que les bases del concursu espresen abiertamente la voluntá d’almitir testos na nuestra llingua, tanto per parte del autor como del xuráu, paezme un actu de normalidá sorrayable dir más p’allá del continente llingüíticu pa valorar el altu valir del conteníu de la obra.

Nesti segundu escalón, y viniendo la valoración d’una persona ensin una formación académica específica nel ámbitu de la Historia, tien de valorase per un llau la rigurosidá nel tratamientu de la información y per otru’l didactismu col que se tresmite ésta al llector (o llectora nesti casu). Asina’l llibru ufierta gran cantidá de bibliografía, cites del periódicu y referencies específiques a dates trescendentales de la nuestra historia; por embargu too ello apaez ordenao y encadenao de manera tala que nun resulta pa nada enguedellada la llectura.

Otra manera, nel mio casu, el llibru faise especialmente interesante pola capacidá de dir xuntando les capes que lleven de la Historia universal a la estatal y de la estatal a la local pa reposar finalmente na historia familiar o, pa ser más concretos, nes histories familiares, yá que na mio familia nun hubo persona dala que formara parte de la Falanxe na ciudá, a lo menos que yo sepa. Si tengo sentío por embargu histories personales qu’entronquen coles que se cuenten nel llibru, asina como conozo a persones que sí emparentaron de manera directa o indirecta colos protagonistes de los mesmos. Esto da-y a esta obra un aliciente especial que nun tienen, ensin dulda, otros llibros d’Historia.

Cuando escribes una entrada nel blogue lo habitual ye qu’organices les palabres neso que dan en llamar “categoríes” o “etiquetes”. Nesti tueru con enclín cultural que va creciendo a lo llargo los años hai categoríes dedicaes a la música, la lliteratura, el cine; cañes toes elles de les que nun puedo falar con gran autoridá del conteníu pero que podríamos coincidir nel continente de llamales espresiones artístiques y culturales. ¿Entra entós nelles el mundu de les series? Tengo pa mí que sí y estes son les cuatro poderoses razones:

The Wire

Nun tengo muncha idea si esta serie que va pasando de boca a oreya como la pólvora llegó a estrenase nes cadenes de la televisión estatal o la Rede ye la única manera d’averase a ella, anque la verdá ye qu’eso nun ha tener mayor importancia. La historia del grupu de policíes de Baltimore que destapen la humanidá del narcotráficu, la política, la educación, los medios de comunicación y ellos mesmos, ye tan grande que merez un capítulu aparte na manera de narrar de les series de televisión. Personaxes como Lester Freamon, Omar Little, Carcetti.. son tan sumamente brillantes nes sos contradiciones, que mereceríen poder vese na gran pantalla d’un cine americanu tan faltu d’imaxinación y valentía últimamente.

Treme

Si gusta The Wire, esta serie tien de gustate, claro. Pero tamién si te presta la música y la vida nesa ciudá tan poco americana que ye Nueva Orleans. Treme, nome del míticu barriu de la capital de la música negra, ta narrada nos meses dempués del pasu del huracán Katrina. Con estes blimes, que nun son males pa nada, la historia va teyéndose sobre’l trabayu actoral (munchos d’ellos repiten de The Wire), la crítica a la xestión de la catástrofe per parte de responsables políticos y medios de comunicación y la honestidá cola que s’avera a la cultura propia d’un llugar en que’l jazz acompaña a los muertos al cementeriu y el Mardi Gras, antroxu nel que se ponen n’evidencia les incoherencies propies y ayenes, ye la folixa oficial.

Boardwalk Empire

Una bona razón pa ver esta serie ye que ta protagonizada Steve Buscemi, actor de los grandes qu’hai poco dicía nuna entrevista qu’esti yera’l papel de la so vida, más que cualesquiera de los qu’interpretara colos Cohen, que yá ye dicir. Otra bona razón ye la impecable ambientación nel Atlantic City de los años venti, sacando un partíu absolutu a los escasos decoraos colos que cuenta la serie. Y otra más: les comparaciones odioses ente’l país de la llei seca y el mundu de la seca ensin llei que nos toca vivir.

Deadwood

Una cosa tengo clara viendo esta serie, d’escoyer una dómina na que ñacer, l’américa del sieglu XIX nun taría ente les prioridaes. Deadwood ye una serie sucia porque lo son los sos personaxes, la so ropa, les uñes, el pelo, la moral. Nun hai nada en caún de los sos capítulos que nun güela a pelu de gochu quemáu, a sangre seco, al sudu que-y cai a Al Swearengen pela frente demientres qu’una prostitula-y fai una felación y él relata los episodios de la so infancia que lu lleven a ser tan sumamente retorcíu. Ye una serie d’escenes mui crudes pero tamién de guiones mui brillantes, con diálogos que recuerden a les bones películes de los cincuenta polo muncho que dicen y lo más que dexen intuir.

En fin, nun se si voi volver a escribir d’esto, en cualesquier casu creo que ye’l tiempu d’añadir una nueva categoría, “Series” o quiciabes “HBO”.

Semeyes de la Sierra de Peña Mayor nos conceyos de Bimenes y Nava. Setiembre de 2011.