Esta selmana hai que salir a la cai. Como tolos años. Pero pa mí, dende una perspectiva personal, docente y asociativa; ye especialmente importante salir pa pone-y voz a unos protagonistes del conflictu que nun tán tan presentes como deberíen, o eso me paez.

Nun diálogu imposible ente los neños y neñes invisibles (esto ye, los que tienen l’asturianu como llingua materna) y la Conseyera d’Educación, Doña Ana González (cuntando que la conseyera pon voz al curriculum asturianu promulgáu pol so mesmu partíu) la cosa podría quedar más o menos asina:

El currículu de la Educación Primaria nel Principáu d’Asturies Decretu 56/2007, de 24 de mayu, pol que se regula la ordenación y afita’l currículu de la Educación Primaria nel Principáu d’Asturies diz nel so entamu, y como base pal desarrollu curricular posterior lo que sigue.

El modelo educativo que plantea el Principado de Asturias desarrolla las enseñanzas reguladoras por la Ley Orgánica de Educación, adaptándolas a las peculiaridades de nuestra Comunidad Autónoma y con unos elementos característicos como la educación en valores, el conocimiento del patrimonio asturiano, el logro de los objetivos europeos en educación, la potenciación de la igualdad de oportunidades y el incremento de los niveles de calidad educativa para todos los alumnos y alumnnas.

Esta ye por tanto la postura oficial de la conseyera, el so primer razonamientu, la parrafada qu’entamaría esta hipotética entrevista; nel supuestu, claro, que la señora conseyera tuviera a bien entrevistase con una parte del alumnáu asturianu que según la so postura oficial nun esiste.

Cartelu de la Manifestación convocada pola Xunta pola Defensa de la Llingua Asturiana

El mio plantegamientu, y la rempuesta razonada del alumnáu invisible entós, ye qu’eses premises nun se cumplen, en nengún casu, con ellos mesmos. Y pa ello aportaré (aportarán) cuatro cenciellos razonamientos:

L’asturianu, un patrimoniu a desconocer y olvidar: La Organización de Naciones Uníes pa la Educación, la Ciencia y la Cultura (UNESCO) fala del plurillingüismu nel ámbitu educativu como única midida pa protexer el patrimoniu inmaterial que suponen les llingües nel mundu. Asina encamienta estratexes concretes como “la enseñanza billingüe, en particular l’usu de la llingua materna, en tolos niveles del sistema educativu y en contestos formales y non formales” asina como “l’asesoramientu sobre les polítiques, la formación de los docentes, la ellaboración de manuales escolares y material didácticu”.

Tocante al asturianu la UNESCO nun tien duldes en asitialu nel so Atles de les Llingües en Peligru, polo que la postura de la máxima autoridá mundial en cuestión de patrimoniu queda entovía más zarrada y les recomendaciones más axustaes.

Énte esto la Conseyería d’Educación sigue ensin incluir l’asturianu (siquieramente como asignatura optativa) en tolos niveles del sistema educativu, siendo especialmente grave la negativa a introducilu nel currículum d’Educación Infantil. Asina mesmo nun fai usu del asturianu en nengún contestu formal (reuniones, comparecencies, circulares, medios dixitales..) nun siendo les propies de l’asignatura de “Lengua Asturiana”. Pa cabu la educación de los docentes nun contempla formación nenguna en materia llingüística, siquieramente sociollingüística; nun cuntando siquiera como méritos específicos pa les oposiciones asturianes el tener dalgún tipu de formación nesta materia.

Con estes blimes, cumplamos los oxetivos: Plantegaes les bases xenerales baxamos (o xubimos) al contestu escolar y nél topámonos cola realidá negada hasta l’estremu pola Conseyería d’Educación: n’Asturies siguen escolarizándose neños y neñes que lleguen a la escuela siendo monollingües asturianos pa los que’l Decretu nun tien rempuestes.

La llingua ye un instrumentu comunicativu y como talu, afecta de mou directu a la comprensión de los mensaxes educativos que s’emiten na escuela. L’alumnáu monollingüe asturianu ta recibiendo nestos momentos un total de 36 hores llectives en castellanu, a descontar les correspondientes a Inglés y Llingua Asturiana (dambes nel meyor de los casos). Pensar qu’esto nun pue tener incidencia na adquisición de les competencies propuestes pa les diferentes materies paezme simplemente desquiciante.

Pa ver hasta qué puntu llega’l despropósitu paga la pena analizar l’únicu oxetivu tocante a la llingua asturiana del que fala l’asignatura de Lengua Castellana.

Lengua Castellana: Valorar la realidad plurilingüe de España y de Asturias apreciándola y valorándola como muestra de riqueza cultural [oxetivu 11], matizando nos conteníos Identificación y respeto de otros códigos lingüísticos en los intercambios comunicativos de su ambiente más cercano: la lengua asturiana [Bloque 1. Sentir, falar, conversar].

Si analizamos esti oxetivu más p’allá del meru elementu estéticu, ha de pensase que dicha “identificación” de los elementos llingüísticos propios del asturianu tendría de pasar primeramente pelos docentes o los llibros de testu; cosa que por desgracia nun pasa nel día a día escolar.

Y falemos d’oportunidaes: La igualdá d’oportunidaes ye una de les principales banderes de los diferentes Gobiernos en materia educativa. Colos antecedentes presentaos paez evidente concluir que l’alumnáu monollingüe asturianu nun tien les mesmes oportunidaes que’l monollingüe castellanu, pero prestaríame introducir otru matiz.

El Decretu asturianu fala d’Atención a la Diversidá nestos términos: El conjunto de actuaciones educativas dirigidas a dar respuesta a las diferentes capacidades, ritmos y estilos de aprendizaje, motivaciones e intereses, situaciones sociales, culturales, lingüísticas y de salud para el alumnado [Capítulu IV. Artículu 16] . La variante llingüística entra por tantu nesti ámbitu, por embargu la Conseyería d’Educación nun tien previstu protocolu, programa, manual, nin documentu dalu pa guiar l’acción educativa de los docentes nesti supuestu. Sí entra por embargu nos casos de los neños y neñes monollingües n’otres llingües diferentes del castellanu, como ye bien natural per otru llau.

Espuestu’l matiz nun ye que seya la mio intención incluir a esti alumnáu dientro del grupu con Necesidaes Especiales d’Atención Educativa, mui al contrario pémeque tenemos que tar bien sollertes nos casos nos que se deriven a los departamentos d’Orientación, supuestos especialmente sangrinos denunciaos yá nel so día pol sindicatu SUATEA. L’oxetivu ye facer sorrayar la falta d’iniciativa a la hora llevar alantre tres pasos que considero básicos: reconocer (con docentes y especialistes formaos y con conciencia llingüística), tratar (estableciendo les ferramientes necesaries pa qu’esti alumnáu tenga les mesmes posibilidaes educatives que’l restu) y aprovechar (positivizando’l fechu de que son los garantes de la sobreviviencia d’un idioma en peligru y que parten cola ventaya de cuntar con una competencia llingüística bonísima nuna llingua más de les qu’espón el currículum).

Y pa cabu, como non, de niveles de calidá: La palabra clave n’educación nestos momentos ye la calidá. Y la calidá mídese (y más que va midise, desgraciadamente), y non siempre pasa polos parámetros que seríen racionales. Ún de los métodos son les pruebes que se concreten nestos díes na “Evaluación Diagnósticu”. Nesta evaluación que se fai nel Cuartu Cursu de Primaria, la Conseyería d’Educación nin plantega nin s’espera plantegue midir la competencia llingüística asturiana. Por contra, d’alcuerdu con tolo dicho, podría pasar que los centros públicos con una población mayor de falantes d’asturianu algame unos resultaos académicos más probes, anque nun soi quien a afirmalo yá que, evidentemente, nun hai interés en facer nengún estudiu qu’afite esta afirmación.

Prestaríame enforma que los neños y neñes invisibles tuvieren la oportunidá d’esponer estos y otros argumentos énte la conseyera d’Educación col instrumentu más verdaderu que tienen: la palabra.

Ente tantu tocarános a nosotros visibilizar el conflictu énte les mesmes puertes del llugar onde se tomen les decisiones afirmando que nun esisten, que nun esistimos.

¿Hai o nun hai motivos pa salir a la cai?

Les y los alcades de los pueblos pequeños saben bien lo que ye’l escrache. Tamién lo saben los conceyales de los más de los conceyos asturianos. Estos y estes representantes políticos tópenlu nel ascensor, na carnicería, na barra’l chigre cuando tán tomando una botellina cola familia; nel despachu de la Casa Conceyu si ye que lu tienen. Caúna de les decisiones polítiques que tomen sobre la Casa Cultura, l’arreglu d’una determinada cai, el mantenimientu de les instalaciones educatives, la programación de les fiestes, los programes de vivienda… pue tar cuestionada diariamente pola ciudadanía a la qu’afecten estes decisiones.

La cercanía de les alministraciones locales y municipales, la convivencia xeneralizada de los responsables de la xestión de lo público coles persones a les que representen xenera una singular forma de democracia participativa qu’acaba tornándose (insisto, xeneralmente) na mayor responsabilidá de los cargos públicos pa colos homes y muyeres colos que viven en común, esto ye, colos que conviven.

A midida que’l poder políticu ye mayor o, porqué non, pasa a garrar una forma más centralizada; la responsabilidá va esmuciéndose hasta’l puntu de desapaecer nel cueru d’un escañu (de los del Congresu, non de los de comer). Los responsables del poder central yá nun tienen el llabor de resolver l’arreglu d’una cai pela que pasen a diariu, sinón d’una carretera que tracen sobre un planu; nun visiten los tarrenos del plan de vivienda, trabayen sobre intereses estratéxicos y datos estadísticos. Nesti contestu ye razonable que se sientan violentaos cuando la responsabilidá y la conciencia pica a la puerta casa, o incluso na puerta del propiu Congresu (como tien pasao nos últimos meses n’España y Portugal).

La rempuesta que planteguen ye la de sancionar a les persones que practiquen escrache, que canten y rodeen el Congresu, pero cuento con qu’entovía hai más. La reforma de la Llei de Bases de Réximen Local que plantega’l Gobiernu estatal de Partíu Popular ye un nuevu intentu d’alloñar la política de les persones, una nueva forma de blindase escontra la responsabilidá. Na midida en que los servicios básicos pasen a depender d’un poder “superior” peor será la capacidá de rempuesta a les necesidaes d’una ciudadanía a la que nun se conoz, cola que nun se convive. Pero hai una segunda consecuencia: cuanto más s’alloñen les decisiones polítiques de les persones a les qu’afecten, menos capacidá tendremos de conocer a los responsables pa poder miralos a los güeyos y dici-yos que nos tán traicionando.

Porque, nun nos engañemos, cuanto mayor ye la cuota de poder mayor ye’l grau de responsabilidá sobre la degradación del sistema democráticu cola que convivimos. Quién nun querría topar nel ascensor, na carnicería, o nel chigre al máximu accionista del Bancu Central Européu, a la directora del Fondu Monetariu Internacional, al responsable de dalguna de les Axencies de Calificación Internacional. Quién nun querría mirar a los güeyos a esa xente, davezu ensin cara, pa face-y escrache, o lo que convenga a la situación.

La cosa ye que sí nos correspuende a nosotros y nosotres devolver la responsabilidá a la puerta casa, y siacasu, tampoco taría de más, a nosotros y nosotres mesmes.

Equí va’l testu espublizáu en “Lliteratura“, revista que representa ún de los exemplos más meritorios del pesu de la nuestra lliteratura.  Espublízase con dalgo de retrasu pol recorte brutal que sufrió (y sufre)  l’Academia de la Llingua Asturiana, recorte qu’afecta a tolos aspectos de los que s’ocupa esta institución, incluyíos los lliterarios.

Axunto les imáxenes que cuento ayuden a entender, un puquitín más, esti cenciellu testu.

El sable moyao exercía la so llexítima resistencia al pasu les botes. Col movimientu, el muestrariu de materia diba garrándose al cueru faciendo’l caminar que presidía la fuxida entá más pesarosu. L’agua, recuperando tarrén, bendecía la procesión col so chiscar d’espluma y ocle, demientres que les piernes entamaben a sentir el pesu del agua frío pegáu a los baxos los pantalones.
La lluz amiyaba nel so pelo sobreesponiendo’l movimientu pendulante de la priesa. Cola mesma cadencia, el fuelgu que-y salía de la boca tresformábase nun soníu orgánicu que acompasaba los segundos que-y restaben pa xubir la escalera que lu devolvía al camín marcáu.
Les botes facíen una parada énte la tierra gris de piedres grises pa tomar la iniciativa nuna carrera interminable. Dexando atrás los artos y les sebes posaba les manes na piedra de la ponte pa descansar el cuerpu nel mugor. El ríu, ensin fondu, semeyaba un platu de metal vacíu.
La pantasma corría penriba la ponte, pingaben los sos pasos como gotes d’agua nun grifu mal zarráu. Diba persiguilu de vuelta a la tierra y los campos ermos, onde l’espaciu yera tan grande que nun había ñubes bastantes pa llenalu. Entraba nes sos llendes como lo fai una vaca tres la guiyada, siguiendo una narración yá escrita.
Énte les alambraes del Centru de Menores, terminada la carrera con aire nuevo, foi quien a asumir la marcha inevitable, la riestra infalible de fotogrames que marcaba la so socesión temporal.

El montador cortó nesi puntu l’últimu rollu. La película taba terminada. El sable moyao tornaba a exercer la so llexítima resistencia al pasu les botes y él, del llau opuestu a la narración de Truffaut, preparábase a siguir viviendo una historia en negativo.

Ayeri tocó ver el documental más comentáu del mes, y si m’apures del añu (a lo menos nos contestos escolares): “Cuestión d’educación“, capítulu 31 del programa “Salvados” que dirixe’l periodista Jordi Évole.

La valoración xeneral ye evidente: la propuesta ta mui bien armada. Y lo ta porque como nel restu de los capítulos que tengo vistos d’esti programa’l presentador va texendo pente medies de preguntes inocentes y tratu candial una rede argumental que sofita una intención previamente ellaborada. A esto tien de sumase un intelixente montaxe, escoyeta d’imáxenes y diálogos que se tienen de mostrar y en qué orden.

Nesti capítulu desgránase en primer términu la Educación n’España y cómo ésta ta mui alloñada de ser un asuntu d’Estáu. Mui a la contra critícase especialmente l’interés de dir cambiando d’una reforma a otra hasta llegar a la crítica directa al modelu que nos propón la próxima LOMCE.

Garrando un avión, Jordi Évole aterriza nel país que ye situáu pol Informe PISA a la cabeza mundial en rendimientu académicu: Finlandia. Entrando nes sos aules, y falando con dalgunos de los protagonistes del procesu educativu (families y docentes, que non alumnáu) preséntasenos una imaxen tremendamente atractiva de la educación, una propuesta mui cercana a la que suañamos miles de docentes d’esti otru estáu.

La virtú de la contraposición de los dos modelos, y en suma del programa en xeneral, ye que nos lleva a la reflexón acerca de los referentes que nos ufierten les alministraciones educatives y, n’últimu o primer términu, les propies metodoloxíes qu’utilizamos diariamente nel aula. Esti ye siempre un camín mui interesante, pero creo que podría dase un reblagu más.

La contraposición de los modelos educativos d’España y Finlandia nun dexa de ser una contraposición tamién de dos modelos políticos bien estremaos. Cola llectura del anteproyectu de la LOMCE el tastu que queda ye’l pasu descaráu hacia una concepción neolliberal de la educación, esto ye, una mercantilización del fechu educativu que pasa por un empeoramientu de la calidá de la enseñanza pública en beneficiu del aumentu de les desigualdaes sociales y económiques de la población. Mui a la escontra la educación en Finlandia tien una base claramente socialdemócrata. L’apueste por una educación de calidá espéyase nel porcentaxe abrumador d’escueles públiques, la gratuidá de los servicios, l’alta formación de los docentes y el consensu políticu por mantener esti sistema nun plazu de tiempu lo más llargu posible.

Esa base d’izquierdes permite amás que les families puedan tar a les cuatro la tarde en casa, que les baxes por maternidá o paternidá permitan realmente la educación de los fíes o fíos nos primeros años y qu’esta educación familiar pueda allargase hasta’l sistema educativu con esos principios de llibertá y curiosidá que tanto nos atraen a nivel didácticu.

El documental de Jordi Évole ye una propuesta bien armada porque tamién, al final del programa, sabe llanzar la pregunta inquietante d’hasta qué puntu ye importante invertir esfuerzos económicos na educación de los más pequeños. Garrando esti testigu y tamién, como ramu a esta modesta reflexón, cabría cuestionase hasta cuánto tamos dimpuestos a lluchar pa tornar esti modelu neolliberal que llega cola vocación de tresformanos, a traviés de lo llaboral, lo educativo y lo social; en xeneraciones perdíes.

Buenas noches a todo el equipo de Carne Cruda;

La sensación que queda dempués d’esta xornada de fuelga, y en bona midida, de toes les que vienen semándose esti añu; ye lo más paecío a aquellos anuncios de la DGT nos qu’una voz n’Off alertaba “esto es lo que tú crees que está pasando” demientres qu’un mozu xubía al so coche convencíu de que diba ser quien a conducilu pese al efectu les drogues.

Nesta fuelga, como nes otres, una voz n’Off llamada trabayu, televisión, periódicos, tertulies radiofóniques… vienen a recordanos un día tres otru por qué nun vamos ser quienes a valtar les coses y por qué, la fuelga, esi sistema decadente y violentu, nun ye la salida que tamos buscando.

Asina, nel telediariu del mediudía, los reporteros nun entrevistaben a les persones coacionaes poles sos empreses pa nun dir a la fuelga, sinón a los que  defendíen estoicamente la so verxa de los incontrolaos grupos de piquetes. El Ministru del Interior nun falaba de los fuelguistes firíos, sinón, y únicamente, de los policíes mancaos por estos; como si dambos nun formaren parte del mesmu grupu de ciudadanía.

Tampoco nel trabayu se sentíen esta selmana comentarios acerca de los avances llaborales que traxeron históricamente les fuelgues. Falábase de la so inoperancia, ensin apurrir alternatives a les que poder garrase pa desbancar a esa “marca tan bien consolidada”. Criticábase la convocatoria de los dos sindicatos mayoritarios, pero nada se dicía del restu de sindicatos convocantes, nin de qué clase de sindicalismu queremos pal mañana, si ye que queremos cambialu y non que desapaeza.

Na tienda ufiertaben recetes pa cambiar les coses, que pasaben pela responsabilidá y la inoportunidá de la protesta. Nada comentaba la tendera de lo inoportuno de la Reforma Llaboral, del rescate financieru, del recorte de drechos y de lliberta d’espresión. Del irresponsable cambiu de modelu que pasa pela desapaición de los servicios públicos, la espresión democrática, la conciencia crítica. Tampoco la clienta-y quitara razón, porque dalgo tamién sintiera nel telediariu del mediudía.

Y nosotros y nosotres, insensatos, aneciamos en desoir les potentes señales faciendo tolo contrario: dexando que nos recorten el sueldu (pa nada), diendo de la mano de los ricos sindicalistes (que van de fartura namás acaba la manifestación), desatendiendo’l trabayu que por suerte (divina) tenemos, combayando colos (violentos) piquetes.. y faciendo en fín tolo que la droga nos pide, ensin planteganos que ye solo “lo que creemos que ta pasando”.

Y con too, qué suerte.

Qué suerte que los drogaos seyamos cientos de miles.

* Fotografíes de El Comercio Digital

Ábrese equí la mio personal esbilla de bones noticies. Llámase “La lluga”, porque lluga ye’l rayín de sol que fura pente les ñubes, y nestos tiempos que cuerren, de ñubes tamos más que fartucos y fartuques.

Siento na radio que Franco Battiato, el cantautor que taba a la busca’l centru gravedá, va ser el nuevu asesor de Bienes Culturales de Sicilia. Na islla, feudu nos últimos años de la drecha berlusconiana, ta acabante ganar les elecciones Rosario Crocetta, candidatu de la izquierda que se declara amás abiertamente gay y que tien tres de sí tres intentos d’asesinatu per parte de la mafia.

Como se diz en mio casa, hai que tragalu.

Ye estraño llevantase un día y constatar que los planes de vida que facíes con venti años poco tienen que ver cola vida que lleves anguaño.

Dalgunes de les coses que conformen la to realidá son frutu del cambiu de perspectiva vital, de les casualidaes y les causalidaes que pueblen les primaveres y tamién, en bona midida, de les decisiones más o menos acertaes qu’exercitaste’l drechu de tomar.

Nesos casos, y colos necesarios matices, nun hai nada que-y reprochar al tiempu. El camín andáu nun ye otro que la construcción personal de la propia historia. La necia llucha escontra un estoicismu yá superáu.

Y siendo verdá too ello, falando d’estos temes coles amigues más cercanes, eses que compartieron los planes de vida dende que nun yeren más qu’eso; tengo pa mí que tamos asumiendo’l determinismu xeneracional de ser menos dueñes de les nuestres vides de lo que fueron, ensin dir más p’allá, los nuestros hermanos y hermanes mayores.

Llevamos años aceptando que’l nuestru camín, la nuestra construcción personal, alcuéntrase nun contestu que nos perpasa, por más que tome por asaltu radios y les televisiones. Seya cual seya la nuestra idea de vida, va tar condicionada por elementos ayenos a la nuestra voluntá. Elementos qu’entendemos, amás, namás a medies.

Nun va dar más qu’actuemos responsable o irresponsablemente, nun ye importante la formación académica, la predisposición al trabayu, l’ambición o’l conceptu de pareya, maternidá o propiedá que tengamos; nunos años, la nuestra vida anónima va tar secuestrada.

Y ye esti fatalismu, n’últimu términu, lo que cuento nos xenera más frustración: la incapacidá velada de facer planes de vida, esto ye, la falta de llibertá sobre lo más importante, el drechu a decidir sobre les nuestres vides. Eses que nun salen nos telediarios, pero que son les nuestres. La vida que vamos poder y querer vivir.

Hai un titular que cuento pasó desapercibíu’l pasáu de 13 de xunetu, cuando Soraya Sáenz de Santamaría, Cristóbal Montoro y Luis de Guindos, escenificaben na rueda de prensa posterior al conseyu de ministros l’acabóse del estáu del bientar n’España: la lliberalización de los servicios ferroviarios y aeroportuarios.

Al marxe d’análisis políticos y económicos que nin quiero nin seguramente tengo capacidá pa facer, prestaríame dir al “casu”, o a lo que llamen cursimente  na radio a les “histories reales”.

Aeropuertu de Barcelona, una filera persones esperen na puerta embarque del vuelu que va p’Asturies. Na filera de delantre mío dos persones con discapacidá, una señora con una minusvalía motora que va en siella de ruedes y un señor dalgo más mozu con una deficiencia visual. Dambos viaxen solos. Al cachu de tar ehí sentaos una muyer d’unos sesenta años identificada col xilecu mariellu que tien Aena pa esti tipu de servicios, avérase a ellos. Podría dicise que fai lo que tien encomendao, esto ye: informa, revisa billetes y acompaña; pero pa ser sinceros el serviciu que presta esta trabayadora nesti momentu concretu nun ye eso namás. Pa entamar establez contactu físicu colos dos, cásique familiar, tranquiliza, entama conversación. Podría, como digo, prestar un serviciu ensin más, pero esta persona va más allá d’esti llabor, o, dicho d’otra manera, fai’l so llabor d’un mou emocionantemente profesional.

La historia real ye esta, y nun tien nada d’estraordinario porque ye dalgo que pasa tolos díes en cada vuelu que sal de los aeropuestos españoles. Ye de suponer, polo tanto, que ye un escenariu que va cambiar d’equí a poco. Cuando s’aplique l’anunciada lliberalización el casu tendrá dos matices nuevos: la precariedá llaboral de les persones que desempeñen esti trabayu y el costu económicu d’esti tipu de servicios “estres” al viaxe contratáu. Quixere enquivocame, anque ye evidente que la venta de servicios públicos consiste tamién neso, na desprotección de les persones más indefenses. Ta pasando col repartu de correos a los entornos rurales o coles llinies de trenes a les poblaciones pequeñes, y la cuenta sigue y medra.

Ye tanto lo que ta pasando y va tan rápido que hasta drames como estos nos pasen desapercibíos. Porque nun soi paráu (de momentu), nin pensionista (tovía),  nin autónomu (esti añu), nin funcionariu (tampoco), nin tengo una hipoteca (menos mal). Porque nun soi discapacitáu. Pero la selva pémeque va metese en toles cases, si nun ye agora más llueu. Ser un neñu, una discapacitada, un ancianu o tar ensin trabayu ye dalgo que va tocanos vivir a toles persones y la protección a los más débiles ha formar parte del nuestru ADN, nun pue pasar desapercibío: nin nun teledariu, nin na prensa, nin na clase política, nin na cai nin na palabra; como ye’l casu.