Tamos de celebración y, amás, por partida doble.

Nel ámbitu de lo xeneral celébrase ún de los díes más guapos del añu: el Día Internacional del Llibru Infantil y Xuvenil.

Nel ámbitu de lo particular celebramos l’estrenu de casa y proyectu.

Un llibru/vida nos espera, vamos buscalos..

Paez que nun soi la única persona a la que l’esperpentu de les pallabres de Berlusconi vitoreándose a sí mesmu y al país que desgobierna-y recordaron a esta escena de la maxistral “To be or not to be” d’Ernst Lubitsch. Sobre too, y penriba de los graos d’inmoralidá que pueda llegar a algamar ¡viva yo! anque nun tea nel guión nin muncho menos seya pa reise…

“En mi empresa ya han despedido a varios compañeros, yo, porsi acaso, ya me he hecho socia de legalitas”

Con anuncios como esti talamente apetez apagar la radio, salir del coche y glayar aquella frase de Mafalda: ¡que paren el mundu que quiero baxar!

Ye una pena que queden en desusu pallabres tan sonores y suxerentes como ésta.

L’afirmación “llevo tola tarde en casa faciendo confitures” sería más propia de mio güela, o de les sos tíes, a les que-yos impartiera clases de repostería un “confiteru” suizu del que nun recuerdo’l nome, pero que contribuyó a poner al día les recetes y asitiar la “confitería” familiar ente lo más moderno del sieglu recién nacíu.

Será por eso que la pallabra “confitura” suéname a rosquielles d’anís y cocaes tostaes nel fornu, a crema de moka, a bizcochu reina, a tortites con dulce de guinda, a güesinos de santu, pastes de manteca y a confitures nel so significáu estrictu, de mazana y zreza sobre manera. Suéname tamién al olor a café de les mañanes de branu, col mantel de flores y los sombreros de paya, “teje teje teje, taja taja taja”.

Confitures que saben a alcordances y alcordances qu’intensifiquen l’olor de les coses y desvirtúen les pallabres modernes quitándo-yos sabor.

¿Quién s’atreve a dicime, por exemplu, qu’un escaparate de pasteles ye a xenerar la mesma actitú contemplativa qu’un cristal que salvaguarda’l místicu placer d’una confitura?

Mi ma afirmó ayer que si ella volviera a nacer y tuviera facultá pa escoyer na persona na que reencarnase, viaxaría al cuerpu d’un paisanu de sesenta años, col farias na boca y xugando al tute nun bar-merenderu como’l Tasqueru, nel altu l’Infanzón.

Si yo volviera a nacer reencarnaríame a ser posible negra y con ritmu. Nun momentu indetermináu de  principios de los sesenta. Obviaría los primeros años y la responsabilidá de ser voz principal y diría a parar a un coru d’otres dos o tres negres con ritmu. Acompañaría a les principales estrelles ximielgando les mios caderes y sentiríame la reina’l mambu, o de la Motown nel so defectu.

Intento imaxinar qué pasaría si nos xuntáremos mio ma y yo nesa segunda vida imaxinada. Anque a lo meyor val más nun pensalo..

Testu esbilláu del llibru “Genghis Khan” de Jack Weatherford, nuna traducción mui poco rigurosa por facelo de la versión castellana y non de la orixinal n’inglés. La otra opción yera copiar directamente’l testu castellanu, pero de cara a la continuidá llingüística d’esti blogue camiento que ye meyor facer la “trampa”. En cualesquier casu paga la pena.

Dempués de facer esperar dellos meses al embaxador francés, Mongke recibiólu de mou oficial el 24 de mayu de 1254. Guillermo de Rubruk fizo saber a los dignatarios que conocía la pallabra de Dios y que viniera a esi llugar pa espardela. Énte los representantes de les dixenbraes reloxones que taben aconceyaos ellí, el kan pidio-y que-yos esplicara la pallabra de Dios. Rubruck dixo unes cuantes frases y sorrayó la importancia que tenía pa los cristianos el mandamientu que diz: “Amarás a Dios penriba de toles coses”, afirmación que llevó al clérigu musulmán a entrugar con incredulidá: “¿Hai dalgún home que nun ame a Dios?”.

Guillermo retrucó: “Los que nun siguen los sos mandamientos nun lu amen”.

Otru clérigu entrugó-y: “¿Acaso tuvieste nel cielu pa conocer los mandamientos de Dios?”. Basñandose no que dicía Guillermo acerca de los mandamientos de la llei de Dios, preguntó-y directamente de mou desafiante: “¿Quies dicir con esto que Mongke Khan nun guarda los mandamientos de Dios?”.

Afortunadamente ensin caxes, nin maleteros hasta arriba, ensin platos embalaos en papeles de periódicu, ensin mantes nin contratos d’alquiler…. múdome dende la páxina vieya porque tenía munchos anuncios y poques posibilidaes, pero sobre manera porque tengo l’enemigu en casa, y eso, yá se sabe, ye mui peligroso… afayaivos nel nuevu tueru…

Sentía l’otru día pela radio una interesante reflexón sobre’l valor de los términos y l’usu, delles veces desvirtuáu, que se fai d’ellos. Venía’l pensamientu al rodiu de les 65 hores selmanales y la capacidá pa convertir en “flexibilidá” lo qu’en condiciones normales sería “esplotación”. Poníense otros exemplos que dan que pensar como’l cambiu del Ministeriu de la guerra pol Ministeriu de defensa; pero yo quédome col de la Flexibilidá.

Entiendo por ser flexible lo que faigo cuando te dexo comer nel mio sitiu de la mesa, pegao a la ventana; o cuando escueyes otra peli de la segunda guerra mundial pa la nueche del vienres; soi tamién flexible nel sitiu ónde quedar, la xente cola que tar o’l llugar al que dir de “vacaciones”; y cuento ser flexible (¡dalgún día!) cuando veo bailar a determinaes compañíes de danza y pienso…¡yo tamién quiero facer eso!. Pero no tocante al trabayu, espaciu de tiempu qu’en sí mesmu nun te pertenez del too, el tiempu pa la flexibilidá ye más bien escasu y l’alcuerdu ente trabayador y contratador paezme más que difícil cuando les razones d’ésti últimu apaecen sofitaes por llei. Y porque, en cualesquier casu, esi alcuerdu yá taba denomáu col términu d’hores estres. Hora menos pa comer, pa ver una peli de guerra, pa garrar un avión o pa dir al teatru. Hora menos de flexibilidá; precisamente.

A la mio casa, ye bien sabío, nun lleguen más que cuatro cadenes, cuatro de les que trés van alternándose de contino pa facer más entreteníu’l vezu de ver la televisión. Nesta selmana les cuatro punxéronse d’alcuerdu pa emitir ún de los meyores anuncios que viera en munchu tiempu. Tratábase d’una socesión de cuerpos desnudos nos que se dibuxaben, como fogonazos, dalgunes de les coses más estraordinaries xeneraes pol ser humanu en tolos ámbitos; arquiteutura, teunoloxía, ciencia, lliteratura… el mensaxe que nos proponía repsol, compañía que robla la campaña, ye’l maduru y positivista llema de “cambiemos el futuru”. Y entós ye cuando vien, tamién como un fogonazu, el recuerdu de les pintaes que, tomando lliteralmente les cais de Valparaíso, acusaben a la petrolera española del terrible acosu al que taba sometiendo al pueblu mapuche de la patagonia chilena y arxentina.
Qué casualidaes.