Vista la presión popular pa que recueya les histories que protagonicen los mios neños d’asturianu, y porque ye verdá que la mio memoria ye débil y el mio despiste grande, estreno güei, como pudiere ser cualesquier otru día, esta estaya del blogue: Neñures (recordando esi númberu dolce de la colección Escolín).

Clase de terceru de Primaria. Neña escribe carta a los reis magos n’asturianu. Coméntame - ¿Puedo decirles donde tienen que llevar los regalos? - Escribe: Casa abuela ……. . - ¿Cómo llames a la persona que vive nesa casa? - mírame como si-y preguntara una obviedá - Güelita.

Güelita. Claro. Agora namás hai de pasalo a papel.

Tardé unes cuantes selmanes en decidime a xubir la entrevista que me fizo Mar,  la resposable de la Biblioteca Virtual Maria Josefa Canellada a ésti, el mio espaciu na Rede (hasta que la ministra de Cultura se dicida a dicinos lo contrario).

Tardé porque me cuesta enforma eso de dar la cara (sacante cuando ye pola oficilidá), pero finalmente, ehí va, y que seya lo que seya…

A lo menos los diez mil más ún tenemos que venos les cares esti sábadu en La Pola

Ayer pela mañana punxi otra vuelta la mio firma nun contratu que, baxo’l testu “Lengua Asturiana”, ponía dalgo asina como “cubrir vacante de manera provisional hasta que se cubra la mesma de manera definitiva”

Entiendo entós que la mio consideranza ye de provisional - poro -  d’una plaza definitiva - poro - plaza qu’hai de cubrir con un  funcionariu de carrera - poro - que se someta a les pruebes selectives - poro - que tenga los mesmos drechos y obligaciones que’l restu - poro - ¿Por qué esti añu nun se convocaron places de profesoráu de “Lengua Asturiana” nos procesos selectivos?

Faigámoslo al revés. Nun se convocaron places de profesoráu de “Lengua Asturiana” - poro - nun tenemos nin los mesmos drechos nin les mesmes obligaciones que’l restu - poro - pa ser docente d’asturianu nun fai falta sometese a procesu selectivu dalu - poro - como talos nunca vamos poder optar a una plaza de funcionariu de carrera - poro - sigo y siguiré como provisional anque tea más que dispuesta a sometese a tal procesu.

En fin. Pa nun alloriar queriendo facer lóxico lo ilóxico, voi respirar unes cuantes veces y relaxame con una de les meyores escenes (pa mi) de la historia del cine. Con situaciones como éstes ye verdaderamente imprescindible que te faigan ríir.

L’aragonés y el catalán n’Aragón:

Manifiestu “Ley de Lenguas”

L’asturianu y la fala n’Asturies:

Anque les clases d’aragonés pasen desapercibíes les más de les veces (formen parte de la ufierta estraescolar), la llingua propia sí ye percibible en bien de families (cola alegría que supón siempre escuchar a un neñu falando nuna llingua en peligru).
La primer vez que sentí charrar patués abultóme que la distancia en quilómetros acurtiábase ente la mio casa y aquel valle nel que me tocaba vivir.
Viendo esti reportaxe pue entendese por qué.

Llégame un titular con fecha cambiada:
“Sabino Fernández Campo considera exagerado que se quiera poner una escuela de bable”.
¿Una escuela de bable?, ¿ónde?.. nun tenía noticia. Diz amás que “tenemos una lengua común regulada y perfecta”, y que les otres llingües, ente les qu’entiendo que ta esi bable de la escuela, tán bien pero “dentro de su ámbito familiar”. Claro. Entiéndese entós lo de la escuela, si ye una llingua pa falar cola familia, y siacasu en dalgún chigre, ¿pa qué vamos dir a estudiala a la escuela? ¿pa qu’aspire a ser una llingua “regulada y perfecta? quita, quita, pa eso yá ta la común..¿l’inglés yera, non?
Hai que fastidiase qu’estes sesudes reflexones formen parte del seminariu “Recuerdos, realidad y futuro”. Paez evidente suponer que pertenezan a la estaya de “recuerdos”, porque d’otra manera, y a estes altures, nun faen más que suscitar una sonrisa, ¿o non?.

Un sistema democráticu tan poco participativu como’l nuestru, siempre tiende a xenerate duldes sobre la xusticia o idoneidá del so plategamientu. Siempre tiendes a pensar (ye’l mio casu polo menos) que l’aportación d’un votu nun determináu momentu nun ye bastante y que deberíamos ser quienes a participar nes decisiones polítiques d’un mou más activu.
El casu del asturianu y el tratamientu que-y vien dando la más de la clase política asturiana durante les últimes décades paezme del too paradigmático.
Partimos d’un supuestu totalmente xustu, diría cuasi qu’inocente, que como sabemos comparte gran parte de la sociedá pasivamente, y que moviliza a otru tanto d’una y otra manera y por embargu… les decisiones de un puñáu de persones torguen una y otra vuelta esti supuestu.
Ye una pena pensar que muncha de la xente que tará’l próximu llunes n’Uviéu bien podía tar na mesa d’alderique del testu estatutariu, con muncha más autoridá. Pero como asina tán les coses ellí taremos, y como nesti sistema eso ye lo que somos: xente ensin autoridá que yá exerció’l drechu al votu, digo yo que polo menos paga la pena ser un bultu, pero un bultu grande, una autoridá grande, una presión bultable.