Pa los que nun tuvisteis, Mar colos sos vidios, Silvia coles sos semeyes y Álvaro con dambes coses (semeyes y vidiu), qu’equí cuelgo, ponen más fácil la xera de facese una idea.

Pa los que sí, infinites les gracies. Sobre manera al presentador y al neñu y les neñes qu’aguantaron estoicamente la presentación de los mayores: Deva, Mulu, Claudia, Enol y Carlota. Pa ellos dirá, como correspuende, la última de les presentaciones nel Fnac de Parque Principáu’l próximu 9 de xunetu.

Vaya per delantre que nun va haber comida nin bebida, pero igualmente ehí va’l convite pa la presentación de “Mio ma, la pirata”. Tais toes y toos invitaos.

Gracies a Europa Press, Les Noticies y asturies.com por dicir esto mesmo dende les sos ventanes enormes.

Coinciden nesti día del llibru (y la palabra “coincidencia” nun ye un adornu nesti casu) dos alegríes lliteraries mui importantes pa mí.

La primera d’elles ye la que me traxo esta mañana’l poder tener (¡por fín!) ente les manes l’álbum ilustráu “Mio ma, la pirata”, del que yá falara más ampliamente n’otra entrada d’esti blogue, a la que remito, por nun repetime. Tener un fíu siempre ye una alegría, pero cuando posa tan bien nes manes como ésti la felicidá ye doble.

La segunda ye la espublización d’una nueva edición de  “La neña de les trences al revés”, pero esta vez n’alfabetu braille. Préstame enforma que los neños y neñes ciegues puedan tener la oportunidá de lleer esta historia n’asturianu coles manes. D’esta edición son responsables enteramente Pedro y Carmen, a los que quiero dar les gracies más cariñoses publicamente, yá que, amás, se que visiten con frecuencia esti espaciu na Rede.

Tamos de celebración y, amás, por partida doble.

Nel ámbitu de lo xeneral celébrase ún de los díes más guapos del añu: el Día Internacional del Llibru Infantil y Xuvenil.

Nel ámbitu de lo particular celebramos l’estrenu de casa y proyectu.

Un llibru/vida nos espera, vamos buscalos..

Si-y das a escoyer a un neñu ente un llibru de reis y ún de pitares la escoyeta ye bien difícil. Ye verdá que’l personaxe del rei, lo mesmo que’l de los sos descendientes, príncipes y princeses, son los protagonistes absolutos del cuentu clásicu; pero los pirates, personaxes indómitos con un aquel de maldá, sorna y antiautoritarismu, tán ente los primeros de la llista de preferencies.

“Mio ma, la pirata” ta cuntáu en primer persona pol fíu d’una pirata, personaxe que fai un doble saltu mortal por aquello de ser muyer y al tiempu representar el papel del rebelde y non de la princesa desvalida. Ye verdá que na so “Historia Xeneral de los Pirates” Daniel Dafoe “documenta” la vida de dos pirates: Mary Read y Anne Bonny; pero “Mio ma la pirata” namás fai usu de los fechos históricos pa xenerar situaciones totalmente imaxinaries que, dacuando, resulten verdaderamente sorrealistes.

L’oxetivu: facer riír a los neños y les neñes que lu llean y, sobre manera, que-yos preste. Por esa razón “utilicé” al mio alumnáu del pasáu añu d’auténticos críticos, por eso acepté les sos suxerencies y pa cabu cambié totalmente la idea orixinal por un cuentín muncho más cenciellu, menos poéticu, más divertíu y más frescu (cuento).

Lo que nun m’imaxinaba por embargu al entamu d’esta historia yera qu’esi cuentín diba tar ilustráu poles guapísimes obres de Gloria Caamaño, les mesmes qu’ilustren esta entrada y, dende llueu, les mesmes que-y dan la pincelada que fai especial a esti álbum. Tampoco sabía que diba acompañame la paciente xenerosidá de Silvia, que cuntó con toles mios suxerencies y que me tuvo informada, coma a coma, durante tol procesu.

Ye por eso que me presta tanto que salga, nunes poques selmanes, “Mio ma la pirata”, porque tengo la esperanza de que, puestos na mesma estantería, los neños del futuru separten a los reis y disfruten cola llectura d’una de pirates.

Siguiremos informando…

Esti añu los magos tamién pararon na “Llibreía de bolsillo”. Nun se si-yos punxeron sidra achampanao o agua pa los camellos pero’l casu ye que, cola escusa de la llegada d’unos llibros que tenía encargaos, el mio llibreru fizo que m’averara hasta la llibrería pa regalame (con papel y too) esti guapísimu llibru que llevaba díes masuñando.

“Carta a un hijo” nun tien más testu que’l famosísimu poema de Rudyard Kipling na traducción de José Manuel Gómez Luque. La editorial Edelvives garra estes pallabres pa enllenar un álbum de gran (grandísimu) formatu que dibuxa l’ilustrador Mauro Evangelista. Les sos imáxenes remítennos al “universu Kipling”, esi onde la piel blanca que s’escuende debaxo de grandes sombreros describe les grandes colonies del pasáu sieglu. Al empar remítenos a la voz d’un poema honestu que diz verdaes qu’españen, inda agora, xusto cien años dempués.

Nun fai falta dicir que’l regalu prestóme pola vida.

Revisando les estadístiques del Blogue descubrí hai unos díes qu’acaben d’enllazanos nel blogue “Darabuc: Literatura infantil y ilustración”, dende’l mio puntu de vista una de les páxines más completes sobre esti mundu tan guapu de la Lliteratura pa la reciella.

Habrá que celebralo.

Tardé unes cuantes selmanes en decidime a xubir la entrevista que me fizo Mar,  la resposable de la Biblioteca Virtual Maria Josefa Canellada a ésti, el mio espaciu na Rede (hasta que la ministra de Cultura se dicida a dicinos lo contrario).

Tardé porque me cuesta enforma eso de dar la cara (sacante cuando ye pola oficilidá), pero finalmente, ehí va, y que seya lo que seya…

Por fin conseguimos cambia-y la cara a la páxina de “A la gueta los sueños”. Facei a lo menos el primer y más importante cambiu de los previstos. D’ello tien muncha culpa’l bon llabor d’Alfonso y la guapa ilustración de David.

Gracies a dambos.

Yá toi calzando los nuevos zapatos coloraos pa ver qué tal me prueben peles baldoses amarielles.

Van pasando los años y cada vuelta me presta más que me regalen llibros “pa neños”. Ye un contrasentíu. Asúmolo. Pero cuando esti 17 d’ochobre desenvolví’l paquete que portaba “Emigrantes” iluminóseme la cara. El tercer volume de Shaun Tan yá taba por fin na mio estantería.

“Emigrantes” ye un álbum ilustráu ensin testu. Una narración gráfica que canta a los sentimientos espresaos pente medies de les imáxenes. Un averamientu a la historia de les migraciones ensin datos nin feches.

Nel llibru toles histories tienen un aquel del mundu fantásticu del autor. Los paisaxes opresores afítense con llingües malignes qu’arrodien les cases, y los llugares tranquilos son allumaos por pincelaes cálides y suaves. Nada ye azaroso y cada elementu llogra tresmitir dalguna sensación.

El silenciu, que ye más llevaderu pente medies del averamientu al llinguaxe del tebéu del autor; tamién ye la historia de los homes y muyeres que nun conocen les llingües del llugar onde posen. Les histories de persones, sobre manera, que por distintos motivos dexen les sos cases. Que pasen a formar parte de les semeyes en sepia que topamos nos fondos de les maletes y que Shaun Tan, otra vuelta, rescata tan xenialmente nesti llibru que definitivamente ye un regalu.