Una de les coses que fizo que tuviéramos que facturar les nuestres mochiles por sobrepesu a la vuelta de Turquía, fue’l querer cargar coles diferentes realidaes qu’ufierta un país que, mal que-y pese delles veces, ye’l noyu onde s’axunta oriente y occidente.

Istambul yera la última parada del míticu Lorient Express y tamién la exa comercial a la que llegaben munchos de los productos de la llamada Ruta de la Seda. Nun ye casualidá que nel sieglu XV se llevantara na ciudá ún de los bazares más grandes del mundu, como tampoco lo ye’l so enclave nel Cuernu d’Oru, anque eso en realidá, nun venga al casu.

Volviendo al Gran Bazar, y obviando les numberoses tiendes de recuerdos turcos “made in china” y los pasiellos de xoyeríes colos escaparates estraos de diseños d’oru al gustu de los Emiratos Árabes; topamos nesta inmensa ciudá comercial dalgunos de los espexismos d’oriente que, a fin de cuentes, díbamos buscando. Asina, escapando de les aveníes onde camudes nuna presa fácil de cazar y distinguir al gritu de “¡¿españoles?!”, el Bazar ramifícase nuna socesión de pasiellos estrechísimos y patios con parres qu’agospien decenes de tiendes de vieyo, barberíes y kahvehane onde los homes xueguen al backgammon y beben te. Al llau d’una d’estes teteríes un ancianu de llarga barba cambiaba’l discu de la so tienda de gramófonos por una nueva melodía de Big Band al estilu Benny Goodman, demientres dalgún de los munchos mozos que percuerren los pasiellos con una bandexa dorada axuntaba-y un nuevu vasu de te de mazana a los acumulaos a lo llargo’l día.

Mas o menos per esa zona dimos con un pequeñu pasiellu nel que s’axuntaben les tiendes de productos d’Afganistán. Yeren unes cuatro en total y nelles los comerciantes esperaben la llegada del cliente dientro d’un comerciu que, de dalguna manera, pue tener un significáu mui paecíu a lo qu’entendemos por “casa”. Nel interior de la que nos paeció más interesante, una pareya de muyeres arxentines disfrutaba caciplando ente los montones de collares y pulseres y calculando’l preciu en pesos, n’euros, dólares y llires turques, o al revés. Nuna esquina un home vieyu de güeyos rasgaos observaba sentáu nuna siella’l movimientu comercial de los dos fíos. Cuando quedamos solos animámonos a pregunta-y a ún d’ellos pol “pakol” y, nesi momentu, les puertes del comerciu tresformáronse dafechamente nes puertes d’una casa por cuenta d’esi xestu que nosotros calculáremos como ordinariu. Dempués d’esi día volvimos tres veces, y en toes elles la familia afgana compuesta (nel Bazar) pol padre y los tres fíos invitónos a te y afalagónos pa sentar a entamar con ellos una conversación que nunca paecía tar pesllada. El medianu de los fíos preguntábanos sobre la situación económica n’España y nosotros respondíamos-y con preguntes poco erudites pero mui interesaes acerca de la situación d’Afganistán y la convivencia de les diferentes etnies. Asuntu que, por razones evidentes, más nos interesaba. Nuna de les conversaciones confesónos la so desconfianza hacia’l plantegamientu actual de la política del so país, y el so apueste por un estáu federal nel que tolos grupos tuvieren representaos: pastunes, tayikos, hazaras y uzbekos.

L’últimu de los nuestros díes n’Istambul volvimos al Gran Bazar únicamente por dispidinos de la familia. Ésta convidonos a volver a venos y, nun futuru, acompañanos a visitar el so país, a lo menos a la zona norte de la que procedíen y a la que volvíen de xemes en cuando a comprar mercancía.

Cuando’l pasáu 4 de setiembre un ataque de la OTAN mataba a una cantidá incierta de persones precisamente nesa zona d’Afganistán, mire otra vuelta nel fondu de la mochila pa recordar lo que me quedaba d’aquel brevísimu alcuentru, poniéndo-y cara per primer vez a un conflictu que se trata con cifres aprosimaes ya informaciones poco riguroses, cambiando los “pakol” por turbantes cuando interesa, poniéndo-y asina una nueva piedra enriba de la muria que separta a oriente y occidente non simpre pel puente de Gálata.

De vuelta a les imáxenes d’Istambul rescato un retayu del llibru “Costantinopla” d’Isaac Asimov al que me remitía la constante de la bandera turca en tolos momentos de la ciudá, y tamién, anque más discreta, na semeya.

“Los bizantinos ficieron un llamáu a los vieyos señores d’Atenes colos que rompieren facía malpenes quince años. Atenes respondió-yos de siguío. Atenes podía pensar que los bizantinos merecíen pagar pol entusiasmu col que refugaren la confederación ateniense, pero los sos ciudadanos nun podíen permitise’l luxu de dexase llevar por esi sentimientu. Bizancio dominaba les rutes de los cereales, y por eso Atenes nun tuvo otra que lluchar. Unvió la so flota hacia’l norte y usóla p’aprovisionar la ciudá. Filipo nun tenía poder naval dalu, y ensin él nun yera quien a tomar Bizancio.
Falló nel so intentu d’un ataque nocturnu por sorpresa al descubrilu la lluna. Tuvo que retirase. Quedó con Tracia, pero perdió la oportunidá de conquistar los estrechos.
L’esitu de la so resistencia énte Filipo xeneró un contentu enorme ente los trunfantes bizantinos. Venceyáronlu a la diosa patrona de la lluna, Hécate, pola ayuda que-yos diera la so lluz. Acuñaron monedes conmemoratives que llevaben el símbolu de la nueche como devotos d’una diosa llunar, la lluna creciente y una estrella. La lluna creciente y la estrella siguen siendo inda güei’l símbolu de la ciudá.”

Si camudara en gatu (premisa poco probable)  viviría n’Estambul.

Esta decisión, tomada yá a los pocos díes de tar na ciudá que separta (o axunta) oriente y occidente, concretóse na midida que fuimos viendo hasta qué puntu los gatos son parte constitutiva de la ciudá. Nun ye que los estambulís seyan amantes de los gatos, ye que los propios gatos son estambulís de primer orde que se sienten al to llau nes comides y baxo la siella demientres tomes té. Los gatos decoren escaparates de tiendes d’ilustraciones y mapes antiguos y paseen ente los kilims y les alfombres enseñando’l productu como un comerciante más. Tamién anden pel puertu d’Aminonu viendo desembarcar a los viaxeros y compadécense de los páxaros y los coneyos qu’esperen tres la xaula del Bazar de les Especies a que pasen les hores de sol.

Si fuera gatu podría ser la gata preñada de mirada triste de San Salvador en Chora, o los gatos flacos y sucios de les apretaes cais de Balat. A lo meyor podría convertime nel gatu de les mil cicatrices que defendía’l so puestu énte’l bar de la esquina, o’l gatu mozu que saltaba de mosaicu en mosaicu p’abellugase ente los pliegues de la mio falda.

Si fuera gatu n’Estambul, o gata nel so casu (premisa igualmente poco probable) cuento con que sería ún de los gatos del Sahaflar Carsisi o Bazar de los Llibros. Nun vaya a pensase por embargu que por espíritu intelectual felinu, o tan siquiera por vezu llector. Simplemente habitaría’l Sahaflar Carsisi por ser un llugar preserváu del sol poles rames de los árboles que s’enllacen formando un tendeyón verde y del calor por una fonte que visiten los sos habitantes con frecuencia. Un sitiu llibre de los coches que piten pa cambiar de carril y de los montones de basura que s’amontonen nes cais a partir les siete la tarde. Un llugar pa tar y vivir, por mor de les siestes sobre los llibros de sicoloxía y les tertulies sobre les rames de los árboles. Habitable, a lo menos, hasta que me pete cambiar de parroquia qu’a la fin, ye lo que faen los gatos.