Cuando escribes una entrada nel blogue lo habitual ye qu’organices les palabres neso que dan en llamar “categoríes” o “etiquetes”. Nesti tueru con enclín cultural que va creciendo a lo llargo los años hai categoríes dedicaes a la música, la lliteratura, el cine; cañes toes elles de les que nun puedo falar con gran autoridá del conteníu pero que podríamos coincidir nel continente de llamales espresiones artístiques y culturales. ¿Entra entós nelles el mundu de les series? Tengo pa mí que sí y estes son les cuatro poderoses razones:

The Wire

Nun tengo muncha idea si esta serie que va pasando de boca a oreya como la pólvora llegó a estrenase nes cadenes de la televisión estatal o la Rede ye la única manera d’averase a ella, anque la verdá ye qu’eso nun ha tener mayor importancia. La historia del grupu de policíes de Baltimore que destapen la humanidá del narcotráficu, la política, la educación, los medios de comunicación y ellos mesmos, ye tan grande que merez un capítulu aparte na manera de narrar de les series de televisión. Personaxes como Lester Freamon, Omar Little, Carcetti.. son tan sumamente brillantes nes sos contradiciones, que mereceríen poder vese na gran pantalla d’un cine americanu tan faltu d’imaxinación y valentía últimamente.

Treme

Si gusta The Wire, esta serie tien de gustate, claro. Pero tamién si te presta la música y la vida nesa ciudá tan poco americana que ye Nueva Orleans. Treme, nome del míticu barriu de la capital de la música negra, ta narrada nos meses dempués del pasu del huracán Katrina. Con estes blimes, que nun son males pa nada, la historia va teyéndose sobre’l trabayu actoral (munchos d’ellos repiten de The Wire), la crítica a la xestión de la catástrofe per parte de responsables políticos y medios de comunicación y la honestidá cola que s’avera a la cultura propia d’un llugar en que’l jazz acompaña a los muertos al cementeriu y el Mardi Gras, antroxu nel que se ponen n’evidencia les incoherencies propies y ayenes, ye la folixa oficial.

Boardwalk Empire

Una bona razón pa ver esta serie ye que ta protagonizada Steve Buscemi, actor de los grandes qu’hai poco dicía nuna entrevista qu’esti yera’l papel de la so vida, más que cualesquiera de los qu’interpretara colos Cohen, que yá ye dicir. Otra bona razón ye la impecable ambientación nel Atlantic City de los años venti, sacando un partíu absolutu a los escasos decoraos colos que cuenta la serie. Y otra más: les comparaciones odioses ente’l país de la llei seca y el mundu de la seca ensin llei que nos toca vivir.

Deadwood

Una cosa tengo clara viendo esta serie, d’escoyer una dómina na que ñacer, l’américa del sieglu XIX nun taría ente les prioridaes. Deadwood ye una serie sucia porque lo son los sos personaxes, la so ropa, les uñes, el pelo, la moral. Nun hai nada en caún de los sos capítulos que nun güela a pelu de gochu quemáu, a sangre seco, al sudu que-y cai a Al Swearengen pela frente demientres qu’una prostitula-y fai una felación y él relata los episodios de la so infancia que lu lleven a ser tan sumamente retorcíu. Ye una serie d’escenes mui crudes pero tamién de guiones mui brillantes, con diálogos que recuerden a les bones películes de los cincuenta polo muncho que dicen y lo más que dexen intuir.

En fin, nun se si voi volver a escribir d’esto, en cualesquier casu creo que ye’l tiempu d’añadir una nueva categoría, “Series” o quiciabes “HBO”.