“El Ministeriu de Cultura italianu acaba declarar un total de cientu ún de les sos películes clásiques “bien cultural”, lo que supón que les cintes seyan restauraes y protexíes como un monumentu más del país. La idea, que surde de los responsables del Festival de Venezia, comprende les películes filmaes ente’l 1942 y el 1978, ye dicir, ente l’entamu del “neorrealismu” italianu y los nomaos “años de plomu”.
Rescamplen sobre manera los nomes de direutores como Federico Fellini o Luchino Visconti, anque tamién les obres de Roberto Rossellini o Mario Monicelli. Al tratase por embargu d’una midida global, que comprende la proteición de la propia cinta, asegúrase la salvaguarda de los escenarios y los personaxes d’estes obres maestres, asina como los actores que-yos dieron vida: Marcelo Mastroianni, Alberto Sordi, Silvana Mangano, Anna Magnani, Gina Lollobrigida o Sophia Loren.”

Bien ye verdá que lo de que “la estanquera de Fellini ye un monumentu” hai tiempu que ta dientro de la sabiduría popular…