Y esta yera precisamente la imaxe que me vino a la mente cuando esta mañana sentí pela radio la noticia de la muerte de Cyd Charisse.
Nun momentu nel que los musicales tán absolutamente denostaos dientro del mundu del cine (pese a los brillantes proyeutos que pudieron vese nos últimos años), nun m’importa reconocer la mio debilidá pol xéneru con un momentu de la increíble “Singing in the rain” na variación de “Broadway Melody”, al paecer, apueste personal de Gene Kelly dientro de la trama xeneral que robla col magníficu Stanley Donen (nun sé si dalguien s’alcuerda de cuando recibió l’óscar honoríficu baillando claqué).
Una pena en definitiva la muerte d’esta baillarina de musical que, yá nel añu 1952, asegurara les sos piernes por cinco millones de dólares. Mirando pa la semeya sobra entrugase por qué.

Sentía l’otru día pela radio una interesante reflexón sobre’l valor de los términos y l’usu, delles veces desvirtuáu, que se fai d’ellos. Venía’l pensamientu al rodiu de les 65 hores selmanales y la capacidá pa convertir en “flexibilidá” lo qu’en condiciones normales sería “esplotación”. Poníense otros exemplos que dan que pensar como’l cambiu del Ministeriu de la guerra pol Ministeriu de defensa; pero yo quédome col de la Flexibilidá.

Entiendo por ser flexible lo que faigo cuando te dexo comer nel mio sitiu de la mesa, pegao a la ventana; o cuando escueyes otra peli de la segunda guerra mundial pa la nueche del vienres; soi tamién flexible nel sitiu ónde quedar, la xente cola que tar o’l llugar al que dir de “vacaciones”; y cuento ser flexible (¡dalgún día!) cuando veo bailar a determinaes compañíes de danza y pienso…¡yo tamién quiero facer eso!. Pero no tocante al trabayu, espaciu de tiempu qu’en sí mesmu nun te pertenez del too, el tiempu pa la flexibilidá ye más bien escasu y l’alcuerdu ente trabayador y contratador paezme más que difícil cuando les razones d’ésti últimu apaecen sofitaes por llei. Y porque, en cualesquier casu, esi alcuerdu yá taba denomáu col términu d’hores estres. Hora menos pa comer, pa ver una peli de guerra, pa garrar un avión o pa dir al teatru. Hora menos de flexibilidá; precisamente.