Curiosa la entrevista que-y facíen na radio esta mañana a Mariano Rajoy. Curioses les rempuestes que tocaben el tema de la educación y más concretamente la de la ciudadanía, que paez que ye la que más perceguera-y da al políticu español. Curioso que camiente qu’esi tipu de valores tienen de llimitase al ámbitu familiar (quitando’l casu de la relixón, claro) y doblemente curioso que manifieste públicamente’l so apueste por una educación “útil”, que faiga por esparder unos conocimientos que “valgan pal futuru”.
Coinciden estes afirmaciones con un llibru qu’ababo de lleer y que recomiendo vivamente: “La escuela nun ye una empresa”, de la editorial Paidós.
Nél descríbese la tendencia creciente a entender la escuela como un instrumentu de creación de persones que respuendan a les necesidaes del mercáu. Nun fai falta educar persones (nel so sentíu ampliu y globalizáu) sinón especialistes que nun tienen por qué conocer nada más allá de la so propia especialidá.
Esti contestu tremendamente global, pue por embargu rellacionase con asignatures qu’a mí me toquen directamente: ye’l casu de la llingua asturiana nos curricula asturianos, paradigma de conocimientu inútil y ensin futuru tal y como s’entiende y presenta anguaño.
Al marxe de los estudios que desmonten esta visión “inutilizadora” de les llingües minoritaries por mor de les blimes que puen aportanos pal conocimientu d’otres llingües, cuento que ye importante tener clara la presencia del asturianu nes escueles sobre la base d’un conocimientu humanísticu que nos ufierta ferramientes pa vivir, entender y valorar el mundu nel que vivimos.