Dime ¿qué home nun tresgredió enxamás la to Llei?
Dime ¿qué placer tien una vida ensin pecáu?
Si castigues col mal el mal que te faen,
Dime ¿onde ta la diferencia ente Tú y yo?

Omar Jayyám (1048 - 1131)

Mi ma afirmó ayer que si ella volviera a nacer y tuviera facultá pa escoyer na persona na que reencarnase, viaxaría al cuerpu d’un paisanu de sesenta años, col farias na boca y xugando al tute nun bar-merenderu como’l Tasqueru, nel altu l’Infanzón.

Si yo volviera a nacer reencarnaríame a ser posible negra y con ritmu. Nun momentu indetermináu de  principios de los sesenta. Obviaría los primeros años y la responsabilidá de ser voz principal y diría a parar a un coru d’otres dos o tres negres con ritmu. Acompañaría a les principales estrelles ximielgando les mios caderes y sentiríame la reina’l mambu, o de la Motown nel so defectu.

Intento imaxinar qué pasaría si nos xuntáremos mio ma y yo nesa segunda vida imaxinada. Anque a lo meyor val más nun pensalo..

Con estos contratos, toi replanteándome’l mio trabayu.

Colo que taba prestándome lo de ser maestrina rural…