Esmucióse l’atapecer y na nueche, nun fui quien a sacar la mio lluz de tierra de la borrinosa escuridá del prau ensin segar.

Siguiste’l camín marcáu poles faroles y los vezos de los conductores absortos nes llinies del asfaltu.

Y yo, bien lo siento, nun fui quien a separtar el to camín de la llumera de la ciudá dormida.

Hai poques selmanes que s’estrenó esta impresionante cinta que, na mio opinión, sigue la sienda de la irrepetible Baraka

Pue vese completa na propia páxina de Youtube, o si se quier más calidá, mercáse na Fnac por cinco euros…

Si camudara en gatu (premisa poco probable)  viviría n’Estambul.

Esta decisión, tomada yá a los pocos díes de tar na ciudá que separta (o axunta) oriente y occidente, concretóse na midida que fuimos viendo hasta qué puntu los gatos son parte constitutiva de la ciudá. Nun ye que los estambulís seyan amantes de los gatos, ye que los propios gatos son estambulís de primer orde que se sienten al to llau nes comides y baxo la siella demientres tomes té. Los gatos decoren escaparates de tiendes d’ilustraciones y mapes antiguos y paseen ente los kilims y les alfombres enseñando’l productu como un comerciante más. Tamién anden pel puertu d’Aminonu viendo desembarcar a los viaxeros y compadécense de los páxaros y los coneyos qu’esperen tres la xaula del Bazar de les Especies a que pasen les hores de sol.

Si fuera gatu podría ser la gata preñada de mirada triste de San Salvador en Chora, o los gatos flacos y sucios de les apretaes cais de Balat. A lo meyor podría convertime nel gatu de les mil cicatrices que defendía’l so puestu énte’l bar de la esquina, o’l gatu mozu que saltaba de mosaicu en mosaicu p’abellugase ente los pliegues de la mio falda.

Si fuera gatu n’Estambul, o gata nel so casu (premisa igualmente poco probable) cuento con que sería ún de los gatos del Sahaflar Carsisi o Bazar de los Llibros. Nun vaya a pensase por embargu que por espíritu intelectual felinu, o tan siquiera por vezu llector. Simplemente habitaría’l Sahaflar Carsisi por ser un llugar preserváu del sol poles rames de los árboles que s’enllacen formando un tendeyón verde y del calor por una fonte que visiten los sos habitantes con frecuencia. Un sitiu llibre de los coches que piten pa cambiar de carril y de los montones de basura que s’amontonen nes cais a partir les siete la tarde. Un llugar pa tar y vivir, por mor de les siestes sobre los llibros de sicoloxía y les tertulies sobre les rames de los árboles. Habitable, a lo menos, hasta que me pete cambiar de parroquia qu’a la fin, ye lo que faen los gatos.