Clase de segundu de Primaria. Sal per primer vez el conceptu de “per”. Esplico ensin munchu afán.
Acaba la clase y demientres que recueyen pa salir al recréu avérome, como siempre, al aparatu música (un grupu de venti neños que sal al recréu cantando n’asturianu tamién ye normalización llingüística).
Ún de los neños d’orixe marroquí qu’hai na clase diríxese a min con una amplísima sonrisa:
- ¡¡Peralto, profe, ponlo peralto!!

¿Ye ésta la nueche de los cuentos tristes?

…night night.

Esti añu los magos tamién pararon na “Llibreía de bolsillo”. Nun se si-yos punxeron sidra achampanao o agua pa los camellos pero’l casu ye que, cola escusa de la llegada d’unos llibros que tenía encargaos, el mio llibreru fizo que m’averara hasta la llibrería pa regalame (con papel y too) esti guapísimu llibru que llevaba díes masuñando.

“Carta a un hijo” nun tien más testu que’l famosísimu poema de Rudyard Kipling na traducción de José Manuel Gómez Luque. La editorial Edelvives garra estes pallabres pa enllenar un álbum de gran (grandísimu) formatu que dibuxa l’ilustrador Mauro Evangelista. Les sos imáxenes remítennos al “universu Kipling”, esi onde la piel blanca que s’escuende debaxo de grandes sombreros describe les grandes colonies del pasáu sieglu. Al empar remítenos a la voz d’un poema honestu que diz verdaes qu’españen, inda agora, xusto cien años dempués.

Nun fai falta dicir que’l regalu prestóme pola vida.