Agora ye cuando bien siento que la pala, que traza la llinia no fondero’l valle, valtiara aquel tueru calcináu.

Agora que prende en mi l’entemecíu del aire col carbón que respiraba, y que siento nos pulmones la planta melicinal, l’árbol llamargosu, el vexetal antiguu agarráu a la tierra y veneráu pol mundu.

Agora que m’ocupa enteru esi calor de vieyo que posó nel mio cuerpu y lu fizo fueu y enantes carbón y abenayá árbol.

Acaso nun soi yo esi tueru qu’arrastra la pala. Acaso nun soi yo baillando xunta’l tiempu. Y dempués del home.

Dempués del home, nada.

De la recopilación “Una botella d’agua enllena de tierra vivo”

La pasada selmana volví a ver el clásicu de Nanni Moretti “Caro Diario”. Pese a ser una cinta de primeros de los noventa lo primero que pensé ye que, nestos años, volviéraseme tremendamente ochentera. Lo segundo que me resultaba muncho más desordenada de lo que recordaba y lo tercero que seguía teniendo momentos xeniales como la descripción de los fíos únicos de Salina, la radiografía certera y universal de los dermatólogos o, mesmamente, esti cachu del paséu per Roma baxo la banda sonora de Leonard Cohen.