La mio piel ha de ser del mesmu lienzu que’l retratu de Dorian Gray.

Diz la dermatóloga que non solo lo que toco o pongo, tamién lo que siento-y afecta.

Que’l celebru y la piel fórmense al tiempu nel fetu. Por eso se faen ecu.

Tamién esta mañana.

Faigo propiu na páxina personal el trabayu de la paxina llaboral, agora que yá ta agotáu’l cursu.

Queda’l primer númberu de la revista “Pel Camín de la Llingua Asturiana” y la esperanza de que’l que venga siga col númberu dos, revisáu y meyoráu (entiéndase too ello en sentíu simbólicu, anque la revista esista, efectivamente, anque seya en formatu electrónicu).

Pa los que nun tuvisteis, Mar colos sos vidios, Silvia coles sos semeyes y Álvaro con dambes coses (semeyes y vidiu), qu’equí cuelgo, ponen más fácil la xera de facese una idea.

Pa los que sí, infinites les gracies. Sobre manera al presentador y al neñu y les neñes qu’aguantaron estoicamente la presentación de los mayores: Deva, Mulu, Claudia, Enol y Carlota. Pa ellos dirá, como correspuende, la última de les presentaciones nel Fnac de Parque Principáu’l próximu 9 de xunetu.

Clase de Primeru de Primaria. Nel marcu del Añu mundial de la Diversidá Biolóxica introduzco na clase’l términu “Biodiversidá”. - ¿Qué querrá dicir esa palabra tan rara? ¿daguien s’atreve? - Toos s’atreven. Escueyo al más entudiasmáu. Sentencia:

- Quiere decir divertirse todo el tiempo.

Entiendo agora l’entusiasmu.

Vaya per delantre que nun va haber comida nin bebida, pero igualmente ehí va’l convite pa la presentación de “Mio ma, la pirata”. Tais toes y toos invitaos.

Gracies a Europa Press, Les Noticies y asturies.com por dicir esto mesmo dende les sos ventanes enormes.