Por fin se confirmó’l mazazu.
A nivel colectivu paezme estremadamente preocupante que la educación yá nun seya una prioridá; qu’esta noticia llegue con un ex-conceyeru na cárcele por chanchullos y marafundiu de perres; que nun s’alcuerden de la nuestra llingua propia nin pa frenar el “efectu llamada” al que-y teníen tantu mieu.
A nivel personal güei, a lo menos, el baxón ye gordu. Poles hores que llevo estudiaes baxo la premisa de “ye la primer vez que puede ser”; pola incertidume de qué pasará dientro d’ún o dos años; y pola necesidá de siguir faciendo malabares demientres qu’aplaces los “planes de vida”.
En fin, menos mal qu’Exipto y Túnez nos tienen demostrao nestos díes qu’entovía se puen facer revoluciones.

Clase d’Educación Infantil, 5 años. El llibru “Letrilandia” preséntanos la lletra “z” y les fiches de la editorial ufierten una serie de dibuxos en blanco y negro indicando “Pintar aquellas palabras que contengan la letra señalada”.

Apunto pa los “zapatos”, ¡zapatos!, dicen (píntase). Apunto pa la “piña”, ¡piña!, afirmen (nun se pinta). Señalo los “zuecos”, ¡madreñes!, glayen (tampoco se pinta). Claro.

Yá ye oficial. “vivo nuna casa malva” ta acabante de salir d’imprenta y nunos díes tará nes llibreríes.

Entetantu préstame compartir la información apurrida pola editorial, asina como les primeres páxines de la edición n’asturianu.