Diz el papel que l’asignatura de Llingua Asturiana tien vía llibre xurídica. Y a mí pémeque sí, que sí pero non. Y hai delles razones.

La primera d’elles que pamidea nun ye la primer vez que’l Gobiernu del Principáu d’Asturies encarga un informe d’esta triba pa cerciorase del pesu xurídicu de convertir l’asignatura d’asturianu, y de pasu a los sos docentes, nun área más de la enseñanza reglada. Nun ye la primer vez, pero, como tien pasao delles veces colos informes que nun cumplen les espectatives del Gobiernu reinante (por monarquía parllamentaria n’Asturies), el conteníu favorable del mesmu guardóse nun caxón y negóse hasta l’estremu cuando fizo falta.

La principal diferencia entós ente l’informe pantasma y esti del que falamos nun ye menor: tamos refiriéndonos a un informe públicu, esto ye, un documentu que dexa implícitu’l mandáu de tenelu en cuenta nos futuros pasos que se dean na dignificación de la Llingua Asturiana na enseñanza. Pero hai más. Dende’l puntu de vista políticu ye ún de los más intelixentes “recadinos” que pudo dexa-y el Gobiernu de Francisco Álvarez Cascos a la familia que torna d’Estoril. Un recáu que nin va poder nin querer cumplir.

Seguramente pagaba la pena preguntase si de siguir nel Gobiernu la Conseyería d’Educación y Cultura de FAC (esta última, la mesma Conseyería que retayó un cuarenta por cientu’l presupuestu l’Academia) diba siguir alantre cola creación de la especialidá. Pela mio parte tengo más que series duldes. Pero lo que ye innegable ye qu’un Gobiernu que se vien destacando poles chapuces y el mal vendese, fai con esta anuncia una xugada maestra que, pa enriba, nun va tener falta rematar.

Ye polo tanto’l cambiu d’escenariu políticu’l que pon enriba la mesa la segunda de les razones, la que nos coloca na sienda del non. Paez innegable pensar qu’un partíu qu’escondió nun caxón les razones xurídiques y lleva empuñando les ideolóxiques durante trenta años, nun va ser a empobinar midida de normalización nenguna. Tampoco ye probable, creo yo, que lo fuerce’l so eternu sociu de Gobiernu, nin tan siquiera por aquello de la meyora de les condiciones llaborales de los docentes de l’asignatura. Nesti casu nin lo asturiano nin lo d’izquierdes va tirar tanto como p’alloñase del poder, solo faltaba. Y pa rematar, la  entrada n’escena d’UPyD, argoyosu propulsor de siniestru “Manifiesto por la lengua común“,  pon una torga evidente nesti camín.

En definitiva, tal y como se nos plantega’l panorama veo que sí, que sí pero que va ser que non. Eso sí, de verdá qu’espero enquivocame.