L’añu pasáu, por cuenta de la participación de neños y neñes nes procesiones de selmana santa, tocóme presenciar una encendida conversación ente los mios güelos onde mio güela defendía la llibertá de les families a facer lo que quixeren y mio güelu (col so consecuente anticlericalismu), l’actu d’irresponsabilidá que suponía vistir a la reciella colos capiruchos propios d’estes “fiestes”. A la fin, mio güela, con esi reprís tan suyu, dio por terminada la conversación argumentando qu’igual d’irresponsables yeren eses families como lo fuera la nuestra cuando nos llevaba de bien piquiñinos a les manifestaciones “del bable”.

Esti vienres 4 de mayu hai una nueva manifestación d’eses del bable, y yo, na edá adulta yá, decido voluntariamente volver a poner el capiruchu y axuntame a la procesión de selmana les lletres. El paralelismu de mio güela paezme de lo más racional, dende llueu un cachu más que siguir manteniendo la fe nesta relixón nuestra. Y ye que cada añu, cada nueva procesión, se renueven los votos, el compromisu.

A la fin ye eso, comprometese, y esi actu deslígase del otru creu por un argumentu de pesu:  podemos pecar d’inocentes, pero nunca d’irresponsables.

Vienres 4 de mayu. 19.30 hores. Estación del Norte d’Uviéu.

Ehí taremos.