Clas d’asturianu (1 ESO) 9′10 h.

Nun acabé entrar en clas y un neñu revolotia. Pído-y que fale más sele, que nun se.y entiende, y de pasu, que se siente, que me dexe un minutu pa pasar llista y organizar la clas. Depués podrá entrugar lo que quiera.
El neñu bullindiegu nun fai nin casu y afirma “desafiante” sabiendo que me tien ganada de mano:
-Profe… que diz el mio hermanu que nosotros en Riosa, nun decimos “falar”, qu’eso son los gallegos, que nosotros decimos “glayar”.
Yo encantá cola entruga entro al trapu:
- Bono nun anda descamináu “falar” ye una forma occidental, pero “glayar” tampoco ye esauto, porque ye dar glayíos o lo que ye lo mesmo ye cantar, llorar o falar fuerte pa llamar l’atención.
Él mira con aire triunfador a los compañeros riosanos y morciniegos y con sorrisa maliciosa y trunfadora “glayando” espétame:
-¡Claro, eso, que nosotros en Riosa glayamos, a que sí S. ¿ves profe?
Pola cara que punxo supe qu’entá tenía otra preparada col envís de pillame nun renunciu. Y asina yera, tou gayoleru burbusóme a la oreya:
- Amás…diz el mio hermanu … que nosotros… falar… falamos al ganáu…
A mio, yá, escapóseme la risa y con socarronería ( tengo confesalo y con sorrisa triunfadora) respondí-y:
- Sí home sí, eso ye “afalar”, que ye animar al ganáu pa qu’ande, cola guiá, pero tamién ye a berríes, ye verdá. ¡h.a, h.a!
- ¡Ah! entós ye qu’igual nun oyí yo la “a-”, y entendí “falar”. Sentóse atristayáu y pensatible.
- Home- dixi-y p’animalu- igual en Riosa dicen “falar” como variante de “afalar” ¿eh? Pue ser. Por qué nun entrugues en pueblu estes Navidaes y dícesmelo en xineru ¡Val un positivu!.
Escampló-y la cara; entá tenía una oportunidá de ganame.

Por supuestu, tien un sobresaliente na 1ª Evaluación, por esta y otres munches, y tengo confesar que con dalguna pillóme. Pa otra vos cuento lo de María Cuchillo… ¡qué mieu!