Coinciden nesti día del llibru (y la palabra “coincidencia” nun ye un adornu nesti casu) dos alegríes lliteraries mui importantes pa mí.

La primera d’elles ye la que me traxo esta mañana’l poder tener (¡por fín!) ente les manes l’álbum ilustráu “Mio ma, la pirata”, del que yá falara más ampliamente n’otra entrada d’esti blogue, a la que remito, por nun repetime. Tener un fíu siempre ye una alegría, pero cuando posa tan bien nes manes como ésti la felicidá ye doble.

La segunda ye la espublización d’una nueva edición de  “La neña de les trences al revés”, pero esta vez n’alfabetu braille. Préstame enforma que los neños y neñes ciegues puedan tener la oportunidá de lleer esta historia n’asturianu coles manes. D’esta edición son responsables enteramente Pedro y Carmen, a los que quiero dar les gracies más cariñoses publicamente, yá que, amás, se que visiten con frecuencia esti espaciu na Rede.

El DALLA define, nuna de les sos acepciones, la palabra “xeniu” como: Conxuntu [de capacidaes intelectuales estraordinaries y propies de daquién].

Güei cúmplense 121 años del nacimientu d’una de les persones que meyor s’axustara a esta definición.

Celebrémoslo.

Tamos de celebración y, amás, por partida doble.

Nel ámbitu de lo xeneral celébrase ún de los díes más guapos del añu: el Día Internacional del Llibru Infantil y Xuvenil.

Nel ámbitu de lo particular celebramos l’estrenu de casa y proyectu.

Un llibru/vida nos espera, vamos buscalos..

Si-y das a escoyer a un neñu ente un llibru de reis y ún de pitares la escoyeta ye bien difícil. Ye verdá que’l personaxe del rei, lo mesmo que’l de los sos descendientes, príncipes y princeses, son los protagonistes absolutos del cuentu clásicu; pero los pirates, personaxes indómitos con un aquel de maldá, sorna y antiautoritarismu, tán ente los primeros de la llista de preferencies.

“Mio ma, la pirata” ta cuntáu en primer persona pol fíu d’una pirata, personaxe que fai un doble saltu mortal por aquello de ser muyer y al tiempu representar el papel del rebelde y non de la princesa desvalida. Ye verdá que na so “Historia Xeneral de los Pirates” Daniel Dafoe “documenta” la vida de dos pirates: Mary Read y Anne Bonny; pero “Mio ma la pirata” namás fai usu de los fechos históricos pa xenerar situaciones totalmente imaxinaries que, dacuando, resulten verdaderamente sorrealistes.

L’oxetivu: facer riír a los neños y les neñes que lu llean y, sobre manera, que-yos preste. Por esa razón “utilicé” al mio alumnáu del pasáu añu d’auténticos críticos, por eso acepté les sos suxerencies y pa cabu cambié totalmente la idea orixinal por un cuentín muncho más cenciellu, menos poéticu, más divertíu y más frescu (cuento).

Lo que nun m’imaxinaba por embargu al entamu d’esta historia yera qu’esi cuentín diba tar ilustráu poles guapísimes obres de Gloria Caamaño, les mesmes qu’ilustren esta entrada y, dende llueu, les mesmes que-y dan la pincelada que fai especial a esti álbum. Tampoco sabía que diba acompañame la paciente xenerosidá de Silvia, que cuntó con toles mios suxerencies y que me tuvo informada, coma a coma, durante tol procesu.

Ye por eso que me presta tanto que salga, nunes poques selmanes, “Mio ma la pirata”, porque tengo la esperanza de que, puestos na mesma estantería, los neños del futuru separten a los reis y disfruten cola llectura d’una de pirates.

Siguiremos informando…

Dempués d’unes cuantes selmanes ensin prender la televisión sorprendíme a mí mesma esta tarde viendo un documental de naturaleza salvaxe de Xapón. Al marxen del esotismu del reportaxe, y de la propia situación, llamóme l’atención sobre manera’l conocimientu de la sacavera más grande del mundu. Al paecer esi tipu de sacavera xaponesa, neto qu’un animal xurásicu, ye una de les especies más protexíes del país, detalle que nun dexa de llamar l’atención nuna nación sobradamente conocida pol so gustu por esquilmar mares propios y ayenos.

Nun se esactamente onde entamó’l mio gustu poles sacaveres. Tengo un recuerdu vagu de les que cazábemos nos branos nel Puertu Payares, nos regatos que llevaben al ríu Fabar. Teníen el rau especialmente llargu y el pelleyu ensin les manches marielles que-yos son característiques. Eses mesmes llámpares que tenía la qu’apaeció ente’l verde saláu de l’Atalaya hai tamién unos cuantos años.

Berto Peña, persona que sabe a esgaya d’etnografía, comentóme en cierta ocasión que les sacaveres taben venceyaes cola feminidá nes cultures d’Europa del Este. La so fegura allargada apaecía al paecer en bien de representaciones simbóliques asociaes cola fertilidá y la muyer. Muncho más banal qu’esta esplicación ye l’usu simbólicu que se da a la sacavera, y delles veces tamién a la llagartesa, nel ámbitu de la montaña y la escalada nel que, dalguna vez, tuve venceyada.

Seya como fuere ye la sacavera un animal que, en toles sos representaciones, sigue paeciéndome atractivu. Si nos queda dalgo del Totemismu qu’enunciara’l recientemente fallecíu Levi-Strauss, seguramente la sacavera sería esi animal. Seguramente.

El pasáu 29 de xineru’l programa “Música sobre la marcha” de RNE emitió’l conciertu del “Trío Perez Iñesta” (pianu, vigulín y clarinete) dende la Fundación Juan March, interpretando pieces d’Igor Stravinsky, Alban Berg, Ernest Krenek y Joan Albert Amargós.

Esta ye la páxina de Radio Nacional onde podemos votar (en masa) el conciertu d’estos tres artistes.

“All that you left me was a melody”  T.W.

Clase de Primeru de Primaria. Siguimos cola ellaboración del llibrín “Lo que nos cuenten los güelos”. Una de les neñes recítanos el traballingües que-y cuntó so güela y nel qu’apaez la palabra “catar”. Diríxome a los dos neños que sé que tienen ganadería en casa. El primeru d’ellos (vamos llamalu A) dizme que nun sabe, que si significa “atar”. Quedo estrañadísima. El segundu (llamarémoslu B) describe perfectamente’l significáu de “catar” - saca-yos leche a les vaques - afirma seguru.

Yá que tamos vemos un poco más vocabulariu. Investigo si conocen la palabra pa designar la “banqueta” qu’usamos pa catar - ta… tayue….- Y por fin - ¡tayuelu! - contesta B.

Dibúxolu nel enceráu y enantes de qu’acabe de pintar la tercera de les pates grita A - ¡Ah! ¡lo de mucir las vacas!.

Acabáramos.

Nel segundu añu de Maxisteriu ún de los meyores maestros que tuve na Escuela tuvo l’aciertu de ponenos una proyección de diapositives nes que se mostraben (pa mí per primer vez) les famoses semeyes de la xente viendo cine dientro’l contestu de les Misiones Pedagóxiques.

La imaxen de les persones a les que-yos averaron tantes coses nun necesita esplicación,  porque se describe y emociona en sí mesma.

Esti sábadu 13 de febreru emitiráse na RTPA y dientro del programa “Nomes d’Asturies” (14.00 hores) un programa dedicáu a la Escuela Republicana. Yá cola grabadora en mano, valga d’anticipu esti guapu documental qu’avera, de mou específicu, a les Misiones Pedagóxiques:

Clase d’Educación Infantil de 3 años. Sobre la mesa una fueya con una pita por colorear. Ún de los neños piensa en voz alta - yo voi pintala roxa - al tiempu’l compañeru que se sienta enfrente d’él contesta sorprendíu - ¿Cómo? ¿rosa?-. El primeru queda en silenciu, como pensando pa sí “¿Cómo voi pintar una pita rosa? ésti pa tener 3 años nun ye mui espabiláu…”.

Clase de segundu de Primaria. Sal per primer vez el conceptu de “per”. Esplico ensin munchu afán.
Acaba la clase y demientres que recueyen pa salir al recréu avérome, como siempre, al aparatu música (un grupu de venti neños que sal al recréu cantando n’asturianu tamién ye normalización llingüística).
Ún de los neños d’orixe marroquí qu’hai na clase diríxese a min con una amplísima sonrisa:
- ¡¡Peralto, profe, ponlo peralto!!